bandiera italiana

Interretaj komunumoj

verkita de Daniele BINAGHI, je sabato 03/05/2008
publikigita en la revuo n° 3/85 (maggio - giugno 2008), en la rubriko Inform@diko

Interreto utilas ne nur por serĉi informojn, sed ankaŭ por serĉi (kaj renkonti) homojn. Komunumoj en la TTT estas jam malnova afero, eĉ "antikva" pro la rapideco de la ŝanĝoj en la reto; sed lastatempe ekfloregis esperantistaj komunumoj, kiuj uzas la Lingvon Internacian kaj donas specialajn servojn desegnitaj precipe por esperantistoj. Ni vizitis du el la ĉefaj (fakte, plejverŝajne, la du ĉefajn): Amikumu kaj Ipernity.


Amikumu.com

Laŭ la vortoj de Chuck Smith, unu el ĝiaj kreintoj, Amikumu estas "retejo por konekti al aliaj esperantistoj tutmonde: oni ĉefe uzas ĝin por trovi samideanojn tra la tuta mondo kaj komuniki kun ili". Fakte, Amikumu naskiĝis antaŭ ne tro longe, kiam grupo da esperantistaj komputilistoj decidis uzi esperanton utile en interreto; tiel, ekaperis multaj retejoj, inter kiuj Amikumu mem kaj Eklaboru. "Ni vidis ke multaj retejoj, kiel ekzemple Facebook, celas konekti homojn tra la tuta mondo, kaj ni rimarkis ke ne ekzistis tiuspeca retejo por esperantistoj. Esperantistoj havas specialajn bezonojn (ekzemple, ili

ŝatas indiki plurajn lingvojn kiujn ili parolas, aŭ indiki loĝlandon KAJ hejmlandon...), kaj tial ili pli bone fartas ĉe retejo kiu vere estis konstruita por esperantistoj".

Jam pli ol 1832 homoj, el 99 landoj, membriĝis en Amikumu, farante el ĝi la plej grandan komunumon nur por esperantistaj; kaj "tiom da ili daŭre uzas Amikumu-n, ke ni spertas problemojn kun la servilo", rakontas Chuck.

Kial ĝi okazis? Fakte, Amikumu estas (ankoraŭ) sufiĉe simpla: oni povas krei sian propran profilon, por iĝi troveblaj de aliaj esperantistoj tutmonde; prezenti fotojn kaj mesaĝi unu kun la alia. Certe unu el la plej interesaj servoj estas ke oni povas serĉi aliajn esperantistojn kiuj loĝas apude (aŭ en tre fora urbo kiun oni ŝatus viziti). Krom tio, oni trovas babilejon (pri tio ni parolos poste), forumon kaj kelkajn ludetojn, inter kiuj troviĝas Skrablo, krucvortludo en kiu per tegoletoj reprezentantaj literojn de diversaj valoroj oni konstruas sur la tabulo vortoj, kiuj estas interligendaj.

Teknike, Amikumu estis programita per Ruby on Rails, per kiu laŭ Chuck oni povas krei retejon multe pli rapide ol per aliaj programlingvoj kiel PHP; MySQL estis uzita kiel datumbazo.

Ĉu Amikumu evoluos? Laŭ Chuck, certe jes; sed ĝi restos nur esperantista retejo, ĉar "aldoni aliajn lingvojn perdigus ĝian specialecon".


Ipernity.com

Ipernity (IP + eternity) estas retejo kiu ebligas kunhavigi ĉion en Interreto: blogo + fotoj + filmoj + sonaĵoj + ĉiaj specoj de ciferecaj dokumentoj povas esti kunigitaj en unu sola spaco kaj publikigitaj laŭvole. Sed ĝi estas pli ol tio: "ĝi krome instigas interagadon inter la aŭtoroj de la publikigitaj dokumentoj kaj inter tiuj, kiuj ilin malkovras kaj uzas, helpante la ekesto de sociaj grupoj", klarigas la franca

Christian Conti, unu el la administrantoj de tiu ĉi nun famega TTT-komunejo.

La retejo ne naskiĝis por esperantistoj, komence; sed ĝi esperantiĝis en 2007, kiam Paul Peeraerts kaj lia teamo tradukis ĝin en la lingvon de Zamenhof. Post tio, ĝi estis tradukita al aliaj lingvoj, kaj nuntempe proponas 8, inter kiuj la ĉina. Preskaŭ milo da esperantistoj nuntempe membras en Ipernity, uzante ĝin "precipe por blogoj kaj dokumentoj".

La kialo de la sukceso de Ipernity estas la kunigo de ĉiuj servoj, ĉu skribaj ĉu vidaj ĉu sonaj; kaj Christian substrekas ke "la plejparto de la membroj restas en Ipernity ĉar ili ŝategas la kvaliton de la homoj kiujn ili renkontas tie".

Eĉ se ĝi uzas "libera programaro" teknologiojn (Linukso, Apache, MySQL, Ajax kaj PHP), Ipernity ankoraŭ ne atingis la senŝuldan staton, sed ĝiaj 4 administrantoj atendas ĝin ene de du jaroj, danke al novaj servoj kiel ebleco printi siajn fotojn kaj al reklamoj kaj pagaj specialaj membrokotizoj. Sed "la baza membreco restos senpaga", oni certigas.


Babilejo.org

Finfine, komunejo kiu ne estas vera komunejo. Temas pri Babilejo, retejo en kiu vi simple eniras, elektas nomon kaj diskuton kaj... komencas babili kun aliaj esperantistoj. Jes, vi povas uzi Skajpon, aŭ aliajn babilejojn; sed tiu ĉi estas farita ĝuste por esperantistoj.

Multaj eniras unu el la babilĉambroj, kaj poste lasas ĝin malfermita dum la tuta tago, ofte ĉe la laborejo; kiam ili havas tempon por babiladi, aŭ rimarkas ke iu homo kiun ili jam konas ankaŭ aperis, ili rekomencas tajpi. XenoP, ekzemple, rakontas ke li "ĉeestas preskaŭ ĉiutage, sed ne ĉiam provas babili; kaj ekzistas multaj kutimuloj kiel mi, sed iam kaj iam venas novaj vizaĝoj".

Partopreno ŝajne estas tutmonda, kvankam oni devas memori pri la malsamaj vekhoroj de la babilantoj: "ĝenerale homoj el ĉiuj anguloj de la mondo venas, sed ekzistas preferataj regionoj kaj tempoj: ofte venas homoj el Brazilo, ili ŝajne estas babilemaj aŭ babilejoserĉemaj; antaŭ ol kelkaj monatoj venis multaj homoj el Vjetnamio, pro iu IJK aŭ simila; kaj ĉi momente la Rusoj estas la plejmulto ĉi tie", daŭrigas xenoP, el Germanio.

Sufiĉe interese, oni donas la eblecon aldoni babilejan ĉambron al sia propra retpaĝo; oni simple devas enmeti pretigitan kodon en la html kodo de sia paĝo, kaj jen nova babilejo!


Aldonu vian komenton:

info
info
info
info
captcha

L'esperanto © Itala Esperanto-Federacio. Ĉiuj rajtoj rezervitaj.
FEI - via Villoresi, 38 - 20143 MILANO - Italio - telefono/telekopiilo: +39 02 58100857 - www.esperanto.it